Maria Regina College

Għeżież Ġenituri,

Għadna kif bdejna t-tieni term tas-sena skolastika u l-ewwelnett nixtiqilkom ilkoll sena mimlija paċi, hena u sliem.  Nispera li l-vaganzi tal-Milied kienu jiem ta’ mistrieħ għat-tfal kif ukoll ta’ xi ftit studju u qari.  F’dan it-term ikollna l-Eżamijiet ta’ Nofs is-Sena fi Frar, u għalhekk il-preparazzjoni trid tibda minn qabel.  Se jkunu karti tal-eżamijiet fuq bażi tal-Kulleġġ tagħna Maria Regina u fil-ħames suġġetti kollha, jiġifieri l-Malti, l-Ingliż, il-Matematika, ir-Reliġjon u l-Istudji Soċjali, u dan japplika għal-Year 4 u Year 5 filwaqt li l-Year 6 jagħmlu l-eżami Annwali, kif issettjat mid-Direttorat tal-Edukazzjoni.  Ta’ min jirrimarka illi l-eżami tal-Istudji Soċjali (Yr 6) fil-Junior Lyceum u l-Common Entrance Examination ta’ Mejju, issa tneħħa uffiċċjalment filwaqt illi din hija l-aħħar sena li se jsiru l-eżamijiet.

Ix-xhur ta’ Jannar, Frar u Marzu jinkludu diversi laqgħat importanti għat-tfal filwaqt li dettalji ta’ xi attivitajiet għalikom il-ġenituri jingħataw aktar ‘l quddiem.  Ta’ min isemmi l-Parents’ Day li se ssir il-Ġimgħa 26 ta’ Frar, flimkien mal-Iskola Primarja A tal-Mosta, u dik il-ġimgħa stess norganizzaw Book Fair.

Ta’ min isemmi l-għajnuna kbira li intom il-ġenituri tajtuna fl-ewwel term tal-iskola meta sponsorjajtu kotba tal-qari bil-Malti u bi pjaċir ngħid li għandna erba’ settijiet  ta’  kotba  ta’  Classic  Readers  bil-Malti  biex  jintużaw  mill-għalliema fil-klassi, kif ukoll permezz tal-ħidma tal-Kunsill Skolastiku, żidna aktar kotba għal-librerija u wkoll, wara li ddiskutejna u rajna diversi skemi ta’ kotba ta’ qari bl-Ingliż, iddeċidejna li nixtru l-Oxford Reading Tree għall-iskola kollha.

Din hija l-istess sistema li t-tfal raw u użaw fl-ewwel snin tal-Primarja u definittivament hija l-aħjar waħda għat-tfal tagħna, u li se tikkomplimenta l-iskema tal-Ladybird li għandna.  Ta’ dan kollu nixtieq ngħid prosit u grazzi kbira lilkom li xtrajtu jew tajtu l-kotba għall-iskola kif ukoll lill-ġenituri tal-Kunsill għall-ħidma tagħhom, kif ukoll membri tal-istaff li taw l-għajnuna  tagħhom matul il-Book Fair.  Ta’ min jgħid li l-iskema tikkonsisti f’diversi kotba, fiction u non-fiction u żgur li ‘l quddiem inkomplu nżidu aktar settijiet ma’ dawk li diġa’ għandna ħalli jkollna aktar varjeta’ ta’ suġġetti.

Bħalma kellna fl-ewwel term, se norganizzaw xi ħarġiet edukattivi u sportivi.  Tafu li ħadt ħsieb ħarġa ħafna differenti minn tas-soltu fejn kellna titjira mal-Air Malta li għaliha kellna rispons qawwi u l-postijiet kienu limitati għalkemm konna l-iżjed skola li ħadna tfal fuq l-ajruplan.  Naħseb li  kienet esperjenza sabiħa ħafna għal dawk li marru u nittama li fil-futur qarib ikollna okkażjonijiet simili.

Naħseb li tafu wkoll li fl-iskola filgħodu nagħmlu special assemblies kif ukoll kważi kull xahar tlitt itfal minn kull klassi jingħataw ċertifikat fejn ikunu ddistingwew ruħhom għall-imġieba tajba jew għas-servizz mogħti lill-iskola jew għall-impenn.  Għalhekk nenfasizza fuq l-edukazzjoni ħolistika li kull student għandu jirċievi matul il-ħajja skolastika.

Ikun meħtieġ li minn żmien ghal żmien naġġornawkom b’xi dettalji ta’ attivitijiet skolastiċi, u l-importanti dejjem li taqraw u ssegwu flyers li nibagħtulkom id-dar mat-tfal. 

Tislijiet

Edwin Debono

Kap tal-Iskola

Għeżież Ġenituri,

Dan huwa l-ewwel messaġġ tiegħi bħala l-Kap il-ġdid tal-Iskola lilkom ilkoll.  Kien f’Lulju li għadda meta d-Direttur tal-Operat fid-Direttorat tal-Edukazzjoni nfurmani biex nieħu f’idi t-tmexxija tal-Iskola Primarja B tal-Mosta u jien ilqajt din il-kariga b’sodisfazzjon.  Dħalt għaliha b’entużjażmu u impenn fejn beħsiebni nirsisti u naħdem għall-ġid tat-tfal kollha.

Nixtieq l-ewwelnett nirringrazzja kemm lill-Aġent Kap tal-Iskola ta’ qabli, is-Sinjura C Herrera kif ukoll l-Assistent Kap, is-Sur V Mangani tal-għajnuna li tawni u li llum jiffurmaw parti mis-Senior Management Team tal-Iskola.  Persważ li jagħmlu dejjem ħilithom biex jgħinuni mmexxu l-iskola ‘l quddiem, fejn nimmiraw għall-iżvilupp ħolistiku ta’ kull student kif ukoll insebbħu u nieħdu ħsieb il-manteniment tal-ambjent fiżiku tal-Iskola.

Ta’ min isemmi li din is-sena għandna bidliet żgħar fl-istaff akkademiku fejn ilqajna magħna lis-Sinjura M Farrugia (Yr 5) u s-Sur M Agius (Yr 5) u s-Sinjura C Cachia (Complementary) filwaqt li xi      għalliema oħrajn ġew trasferiti jew ħarġu fuq maternity jew parental leave, u lil dawn nixtieq nirringrazzjahom tax-xogħol siewi li wettqu mal-istudenti tal-iskola tagħna meta kienu jgħallmu magħna.

Ta’ min jgħid li l-iskola, għal dawn l-aħħar snin kellha lis-Sur J Vella      bħala handyman illi, filwaqt li nifraħlu għall-kariga ġdida ta’ Precincts  Officer  li ser jokkupa dalwaqt, żgur li nħossu n-nuqqas tiegħu peress li kien jieħu ħsieb kull tip ta’ manteniment fil-bini tal-iskola.

Għadna kif bdejna sena skolastika ġdida u mill-ewwel ħadt l-okkażjoni norganiżża l-Year Group meetings biex inkellmukom dwar diversi punti.  Ħadt pjaċir bl-attendenza sabiħa tagħkom li turi l-interess li turu fl-edukazzjoni ta’ uliedkom filwaqt li diġa’ bdew laqgħat qosra tagħkom il-ġenituri mal-għalliema.

Kull sena l-iskola tħejji pjan ta’ żvilupp u jien flimkien mal-istaff kollu nistinkaw biex inwettquh.  Forsi ndunajtu li nħobb ħafna d-dixxiplina u l-puntwalita’ u għalhekk ninsisti biex it-tfal kollha jiġu bl-uniformi kompluta u fil-ħin.

Ta’ min isemmi r-riżultati sbieħ tat-tfal fl-eżamijiet ta’ Junior Lyceum wara li saru r-resits; b’kollox għaddew 86% tal-istudenti li għamluhom.       Persentaġġ sabiħ u mill-aqwa f’pajjiżna u nixtieq li dan il-livell inżommuh jew intejbuh ukoll.  Rigward is-suġġett tal-Ingliż għandna ħafna fejn    immorru aħjar; b’iżjed qari u l-introduzzjoni tal-English Day kull nhar ta’  Ħamis.

Dalwaqt ikolli l-ewwel laqgħa tal-Kunsill Skolastiku fejn diġa’ ltqajna    informalment u rajt l-entużjażmu tal-membri kollha biex jgħinu l-iskola f’dak kollu li neħtieġu kif ukoll jippjanaw xi ħarġiet għalihom.

F’dan it-term hemm xi attivitajiet jew appuntamenti għat-tfal kif ukoll għall-ġenituri filwaqt li minħabba s-swine flu xi wħud huma fil-parentesi u għad iridu jiġu kkonfermati minħabba raġunijiet ta’ saħħa.

Filwaqt li nittama li intom tkunu dejjem sodifatti bit-tagħlim li jirċievu uliedkom fl-iskola tagħna, nixtieq nirringrazzjakom tal-koperazzjoni li l-amministrazzjoni ssib mingħandkom il-ġenituri.

Insellmilkom

Edwin Debono

Kap tal-iskola